غنّيتها

غنّيتها

شفتك .. وزاد بي الولع والشوق	غنّيتها من ساعة أقبلتي !
عيني ماقد شافت كذا مخلوق	كنّك على ذوقي تشكّلتي !
قلتي لي : إصبر .. بسّ أنا .. المطفوق	عجّلت في شوفك وعجّلتي !
أثر معك لي .. مرسل ومسبوق	عزّ الله إنّك .. قلتي وطلتي !
عين وشفاه وعاتقٍ منتوق	وجسمٍ تغطّينه .. ولا إحتلتي !!
الليل عن وجه القمر مفهوق	والعود .. مالومك إلى مِلْتي !!
غصنٍ على ساقي .. وفيه عذوق	وش الغريبة لو تمايلتي ؟!!
لكن قبل تمشين !! أنا مسروق !!	من صدري قبل شويّ .. وش شلتي ؟!!
أتلى العهد به .. قابضه معلوق	من ساعة أقبلتي وحوّلتي !
ماريّته .. خالي وفيه فتوق	ردّيه .. وآعدّك تجمّلتي !!

ماهو بكفو

ماهو بكفو

ماهو بكفوْ الوقت حبك يمحّيه	ياللّي تخاف صروف الأيام تمحاه !
إرتاح .. مادام المواصل يقوّيه	إنت إنت .. وأنا أنا .. وقلبي هو إيّاه !
حتى ولو بتغيب ذكراك .. تكفيه	ياواحدٍ تكفي عن الناس ذكراه !
حبّك على رمْلة خفوقي مواطيه	ورياح عذلي عنْك ما تمسح خطاه !
والّلي يِعَذل القلب عن درب غاليه	الله بما يبلا المواليف يبلاه !
أخفيه يابا الفيت والحال يبديه	أدناة واحد ينظر الحال يقراه !
مِخفيه فيه ومعتنٍ به وحاميه	من كلّ عينٍ ودّها تنزل حماه !
قلبٍ يحبّك والهوى الذرْب ماليه	كانك مكذّبني .. بعينك تحلاّه !
شرطٍ تشوفك فيه .. منت بحواليه	ويمكن تشوف ديار وآماكن إرعاه !
وبتشوف به تمثال والوقت هاريه	وبتشوف زرعٍ ميّت وواقفٍ ماه !
وبتشوف جرحٍ فيه سكين راعيه	راح ونسى السكين والجرح ينخاه !!
وبتشوف حصنٍ عجّ الأقدار سافيه	وبتشوف باقي بيت راعيه خلاّه !!
لا تنزعج هذا خفوقي وباقيه	ولا تضايق من تصدّع زواياه !
قد زلزله فرقى .. وهزّت عراويه	والله ستر .. والحظ عانه وعافاه !
وكانه صلح لك .. وأعجبك زيد تبنيه	إبنه وجهّز للمقابيل مبناه !
أبغيك بسّ من المفارق تداريه	وإزهل من يداري شعورك ويدراه !
وحلّل وحرّم فيه .. ياأبرك بلاويه	وحلّه وراع رضاي ورضاك ورضاه !!
جعلك بعد بعض الوجيه ... أمحق وجيه	ناسٍ مراتعها الرفيق بتقفّاه !
أنواع .. وأخطر نوع .. ماني بناسيه	نوعٍ على تفريق الأثنين مسعاه !
تلقاه دوم وكلّ يوم تلاقيه	وإلى بغيته صدق ما عاد تلقاه !
ولاّ أنت ردّك كلّ ما أدعيك .. لبّيه	أنا أشهد إن منتوب في عيني أشباه !
منتب مع العالم ولا تقول لي .. ليه ؟	أنت آدرى منّي ووش جوابي وفحواه !!
كذيه .. ومن الله .. يازين واليه	وأغلى طروش القلب ودواه من داه !!!
الحلم ياتيني بزولك وأراعيه	وفي كلّ حلم آقوم قبل آتحفّاه !!
أعشق سميّك في البزارين وأدعيه	وأقبل خطاه إلى خطى وآتلقّاه !!
وإسمك يروّعني إلى مرّ طاريه	وآحبّ ملقوفٍ يسولف وطرّاه !!
وآمرّ بيتك من بعيدٍ ولا آجيه	وآنا لو إنّه في يدي .. ما آتعدّاه !!
حتى ( تواير ) ( موتري ) تلتفت فيه	تبغي تلفّ ويستحي العقل والجاه !!
وصلْك يخيط الصدر والبعد يفريه	ويابري حالي كان صدّيت برياه !!
ويلي على .. ( أدري حبّنا ويش تاليه ؟ )	وويلي على ( أدري وش ورى الغيب ؟ ) ويلاه !
عشان أشوف إذا محبتك .. ترفيه	والله لا أقفّي عنْك .. أستغفر الله

بعض العرب حبه يوردك الجنون

بعض العرب حبه يوردك الجنون

بعض العرب حبه يوردك الجنون	ولا يوصف له غلاه احكاك له
مايقنعه وصف الغلا لو وش يكون	لو كل حرفٍ بالحرير يحاك له
الموت جاك وهو تقلبه الضنون	ولا لك الا الصبر....وش وداك له؟
ان قلت ضايق..قال : هونها تهون	مايدري ان ضيقتك له وبكاك له
تقعد تحبه وانت ساكت ومغبون	يمكن بيوم يقال له ما اوفاك له
وكانك مشكك هو يمون او ما يمون	تخيّل ان عفت الصبر فرقاك له
غلاه من فوق الغلا ماهو بدون	وحكاه سمعك يجبرك بارخاك له
ودك تحطه فالعيون من العيون	وتبسط على رمضى الثرا يمناك له
وتظله من الشمس في ظل الجفون,,,,	ولا يمر اذنه سوا لباك له
وتسج من غيره لونهم يذكرون	ومنين ما سجت القدم ممشاك له
فلو ٍ يميله الترف ميل الغصون	غصن ٍ ليان ومكرمه بسقاك له
جديله الى اقفى ستر منه المتون	كنّي بريحه لالتفت لدعاك له
يزها الملابس ..اي لبس ..واي لون	وفالليل وجهه لا ظهر قداك له
كيك وعسل لكن ماهو في صحون	ودعاك من عين الحسود اغطاك له
الله لا يعطيه ناس س ينضلون	ويستر عليه من النحل لا ياكله
الوصف والتعبير في وصفه يخون	غير اطلب الله يستجيب ادعاك له
وعذال قلبك في محبته يخسون	سكينهم عن قطع حبله حاكله
اللي من لحوم الاوادم ياكلون	وحلوقهم دافع البلا متواكله
ناس ٍ عن اعراض العرب ما يعرضون	ودايم على نفس الشكل والشاكله
في سلمهم اولا بالاكل الاقربون	واطيبهم اللي صيدته شكواك له
يدعيهم الشيطان للذنب ويجون	هذا يقطع له وذاك يواكله
يا جعلهم فدوة ثر الغض الفتون	اللي على الدرب الطويل اخطاك له
طيفه الى نام البشر زارك بهون	وطيفك الى نام البشر سرّاك له
حبه دفان ومقبرة خضر الطعون	بين العظام العوج كنك تاكله
اللي كذا حبه لو تموت مغبون	ولا لك الا الصبر وش وداك له

ودي بك

ودي بك

ودي بك وأبيك وأباك وأبغاك	جمعتها لرضاك واختار فيها
كانك مشكك في الوفا والغلا هاك	جوالي اقر القائمه كل ابيها
رقمك مع (الصادر) ولا (وارد) أسواك	والناس في اللي (لم يرد عليها)

غاسل كفي

غاسل كفي

غاسل كفي من مصافحة بعض اليدين	وقافل بوجيه أهلها صناديق البريد
أشهد اني للبلاوي على الدنيا مدين	كل ما راجعت نفسي طلعت المستفيد
المواقف تشخل الناس والطيب يبين	كل عام يطيح تسعه ويصفى لي وحيد

اندوج بأشقر صافي الظهر والذيل

اندوج بأشقر صافي الظهر والذيل

اندوج بأشقر صافي الظهر والذيل	مطروح قد ريشة ظهره محروقه
يطلع وطلعه لا طلع طلع دربيل	زود على طلعه وطبعه لحوقه
له هيبة في الجو قبل المحابيل	فرخ العقاب ايخاشره في حقوقه

الموت

الموت

الموت تالي العمر والدنيا مقيل	والآخره هي منتهانا لا محال
وديني وحب الناس والخلق النبيل	ثلاث هي دربي الى حسن المئال
الله يقدرني على رد الجميل	واللي يجملني الا جالي مجال

موطني

موطني

قطر موطني وأنا مثل من تربوا فيه	راع البل وراع المال والغيص والفلاح
رجال الا سمعوا نداه أجمعوا لبيه	تطيح الغتر والروس بس العلم ما طاح
سواعد الأمير وفي المحافل فخر ووجيه	ونارد حياض الموت كنحن خرز مسباح

لك حق

لك حق

لك حق تشره لو اني جيت ما جيتك	لاشك يامسندي تاتي ولا تاتي
في غيبتك لاحصل طاريك حييّتك	واحمّل الغربي الساري تحياتي

ابعدت مثل الحرف لا فارق شفاه

ابعدت مثل الحرف لا فارق شفاه

ابعدت مثل الحرف لا فارق شفاه	ثم ضاع باحضان الفضا في العباره
ماهو بفرض اني على طول وياه	الكل منّا عز راسه شعاره
لو كان من راسه الى حد ماطاه	زينه يزيّن خطوته في مساره

ألا يا وجودي

ألا يا وجودي

ألا يا وجودي وجد من فاجأه ديان	برغم اعتزال الناس من كثرة اديونه
بعد ما فضى جيبه وكفه وحاله شان	تناسوه ربعه كنهّم ما يعرفونه
تناسوا مواقيفه ولا كن شيٍ كان	على غير ما ترضى الكرامه يحدونه
وهو كان منقع طيب منهل وفا واحسان	فلاشك عّوان الزمان ايتحدونه
رفع كفه الخالي الي الخالق الرحمن	عقب ما تصافوا كلهم ظلم من دونه

في غيبتك

في غيبتك

في غيبتك ما ألد منا ومنا	ذكراك تملى وحشتك في غيابك
بالوقت في شوفة حلاك اتهنّا	في وقفتك في مشيتك في ثيابك
لاجل العيون الناعسات اتغنّا	الله يخلي لي غلاك وشبابك
البوح لك في شوفتك ما تسنّا	مثل الكفوف الى شغلها التشابك
نسيت نفسي بين خنه وحنّا	بين العيون وبين صافي عذابك

البايع الشاري

البايع الشاري

البايع الشاري مع الناس مقبول	بيع وشرا عادي قبول وتراضي
الى اجتمع مرهي وشاعر ومخبول؟	خلطة ادب فاشل تثير امتعاضي
تشرى الذمم واتباع بالعرض والطول	والكل ينظرها بعينه وراضي
المال خلاّ غير معقول؟ معقول!!	ما ألوم نجم الاغنيّه قام ياضي
ياللأسف ما كل منقول مقبول	ثوبٍ مشجّر جنّب ثوبٍ ابياضي

اذا اللي قبلنا ما علموك

اذا اللي قبلنا ما علموك

اذا اللي قبلنا ما علموك؟	مثل من جا وصدّر ما روا
ونكرانك جميل اللي هدوك	مثل من جوّد الصقر وشوا
وسجّ وهج عن من هم نسوك	ترى من يتبع المقفي غوا

الذكا ما يلبس للفتى لبس ثوب

الذكا ما يلبس للفتى لبس ثوب

الذكا ما يلبس للفتى لبس ثوب	لا يحرّج عليه ولا لمثله مزاد
لا تدافع من اللي يحتمي له بطوب	لا صفى جو مكه وش علي من تشاد
دام فيها مثل ماقيل نفضة جيوب	خل وضح النقا والصدق شف ومراد

حكّم ضميرك

حكّم ضميرك

حكّم ضميرك بين الاثنين واختّر	لاهل العلا جرّه وللدون جرّه
الطيب ماحدد ابّحرٍ ولا برّ	من جا على دربه من الخلق سرّه
يوم اللقا ما انّصف ضعيفٍ ولا سرّ	اللا مع من جاد كرّه وفرّه
لو كان شفت النّاس ببشوت وغتّر	كم من محارٍ ما لقي فيه درّه
الحلقه ان زرّت ابطان الجمل زرّ	ما استرّ من لا عزوةٍ له تسرّه
الجمره ان ماتت فلا ينّفع الكرّ	مافادها الشبّاب لو زاد كرّه
كم واحدٍ يضحك وهو يضمر الشرّ	عرق الشري ما انّباك لونه بقّرّه
ما كل من يضحك بوجه الفتى برّ	من يصدق الصاحب بالافعال برّه

قد عطيتك !

قد عطيتك !

قد عطيتك وانت ماضنك لئيم	والنصيحه لليالي تذكره
لاتحرك جرحي الماضي الاليم	ولاتحسب ان طول بعدك طهره
كل جرح يهون يالجرح القديم	وكل شي قد مضا معك اذكره
جرحي وذكراك والليل البهيم	حزت فوادي بمثل المنشره
العذول غراب وانا اكبر غشيم	والجروح الماء وطاريك حجره
والزمان اكرم من الحظ الكريم	لانفتح لي باب صوبك سكره
وحبك اللي لاطرى لي رحت اهيم	قمت احسب اصغر كلامك واكبره
ليتني عاد الهوا توه فطيم	انعذلت لعاذلي بس خيره
مالقيت من الوفاء يااول نديم	كون صدق الحزن وجهه وظهره
عقب رمح الشوق في وجه الصميم	سيف هجرك في قفاه وشف ثره
وانت شكلك تحسبني في نعيم	لني اخبي صوابي واستره
لايغرك حلم رجال حليم	مهون اللي من سكوته فجره
ولاتحسب الجفن من دمعه عقيم	يستحي منك والى اقفيت انثره
ولايغرك وان بدا جسمي سليم	. والله ان جسمي سوار المقبره
والله ان امر من ضحك الغريم	شوف حقي بين اياديه اشكره
والله ان احر من دمع اليتيم	دمعة الرجال من فرقا مره

عقبال مية عام

عقبال مية عام

عقبال ياماخذ فؤادي مية عام	ضيعتني منك وانا ما اهتديتك
لا ..ما نسيتك كيف بانساك ما دام	ذكرى الفراق تهزني لو نسيتك
حبك قدر وانا على دين الاسلام	مكتوب في وجه الجبين ورضيتك
لك في الضمير الود والحشمه اتوام	ولي في ضميرك مثل ما انا بغيتك
ولك منزلٍ في نايف القلب وخيام	وذود الغلا ترعاه ولا شكيتك
يفطر عليك القلب وان فارقك صام	والله لونك شوك سدره كليتك
القلب طيرٍ لادعي للهوى حام	والا انت وكره من كثر ماهويتك
كن العيون من النظر عقبك ايتام	وكني ماريت الا انت من يوم ريتك
وكنك معي وانا فقدتك من اعوام	مع الخيال القاك كني لقيتك
من صعب وصلك ما تهنيتك احلام	وان جابتك فزيت شوق ومحيتك
يعني وصالك صعب واهدافي اوهام	يعني زرعتك للقدر ماجنيتك
صبرك يقولون العرب كل الايام	يوم عليك ويوم لاجاك جيتك
ويا قلب ياللي ورثك اجروح وآلام	بليتني ماهو بانا اللي بليتك
ولعتني من عادني في الهوى خام	واسرفت بي وانا خطامك عطيتك
طعتك وزبدة طاعتك هم وهيام	مالله كتب لي واستخرت وعصيتك
لوللقلوب اسواق بايع وسوام	لاابدلك وان جيتني ماشريتك
والا انت ياللي جيش عينيك مقدام	لا اقنعت منك والرجا مارجيتك
كني سجين بين..افراج ..واعدام	وكنك سجن وانا بنفسي بنيتك
تنبيك عن حالي محاصيل الالهام	وتخبرك نظراتي نهار التقيتك
عقب الوصال اللي على عين من لام	قدهو يكفيني عن الوصل صيتك
وقدني الى مريت بالشارع العام	لديت من ما في الضمير ودعيتك
ادري ان صوتي ماقطع عشرة اقدام	وادري بي اعود الى من نصيتك
ياشينها يامحنيٍ راس الابهام	ماقدر على شوفك وانا عند بيتك
الاعمار ما تضمن وانا اخاف الاحكام	ارثيك خاف اودعك ما رثيتك